Unidade por Rodeiro aplaude a decisión do goberno de continuar coa inversión no rural cambote

"Imos superar a cantidade de 2.000.000 euros investidos ou comprometidos á metade de lexislatura", recalca Alberte Lamazares

Ecos da Comarca/Rodeiro

A Executiva de Unidade por Rodeiro ( UxR) aplaude a decisión do goberno de continuar coa inversión no rural cambote, tal e como subliña Alberte Lamazares, líder de UxR e tenente de alcalde de Camba.

"Tal e como prometemos en campaña electoral, os fondos provinciais que nos pertencen a través da Liña 1 do plan Máis Provincia volven ir destinados a mellorar as pistas que tan prexudicadas estiveron durante os últimos anos do goberno popular. Este é o exemplo máis palpario de porque UxR sempre esixiu ter peso na área de Obras onde compartimos, xunto co PSOE, a toma de decisións. Para nós, a inversión en pistas e aldeas era innegociable e con esta decisións trasladamos que cumprimos co prometido. Estamos a falar de 463.753,93 euros que nos pertencen por Lei e que poderiamos ter investido en outro tipo de obras", recalca.

Alberte Lamazares.

Con esta cantidade, dende Área económica que dirixe Alberte Lamazares, sinalan que " imos superar a cantidade de 2.000.000 euros investidos ou comprometidos á metade de lexislatura. Probablemente fixeran falta 5 ou 6 anos de gobernos do PP de Cati Somoza para sumar un compromiso tan importante polo Rural Cambote".

É o mais importante, apunta, "é que non descoidamos outras áreas do goberno xa que melloramos a atención social, incrementamos notablemente as axudas culturais e deportivas, así como a inversión nestas áreas destacando o impulso de Sabor Labrego, Gala do Deporte, construción de dúas pistas de padel onde a segunda construirase nos vindeiros meses; mellora do Punto Limpo, adquisición de maquinaria, etc. Dende UXR seguimos a traballar arduamente para levar a cabo as seguintes etapas do noso compromiso cos veciños de Rodeiro, sobre todo cos nosos maiores, apostamos claramante por facer o centro de día, que cunha inversión de máis de 1.100.000 euros cubrirá as necesidades de atención que dende as filas do PP se lles negou os nosos avós".

Publicidade

Preme na imaxe se queres contactar connosco.

Por outra banda, sinala que "estamos a rematar de elaborar os orzamentos municipais que se pretenden levar a pleno durante este mes de abril, isto non sería noticia noutros concellos, pero recordamos que en Rodeiro levamos cos presupostos prorrogados dende o 2017, por culpa da deixadez do PP e Cati Somoza. Tamén valoramos profundamente a cohesión, colaboración e espíritu de traballo que demostra o goberno de Rodeiro que, a diferencia de outras coalicións que xa racharon, está moi unido. UXR está a poñer todos os medios para que isto sexa posible".

"En definitiva, dende Unidade por Rodeiro comprometémonos a transformar a nosa localidade con políticas diferentes onde non se deixe ninguén atrás e estamos no camiño correcto, orgullosos do traballo feito e ilusionados por todo o que esta por vir", conclúe Lamazares.