Unha muller ferida e atrapada tras envorcar co seu coche en Guntín

Ecos da Comarca/Xeral

Unha muller resultou ferida e atrapada no interior do vehículo que conducía tras sufrir unha saída de vía na LU-P-1611, á altura do quilómetro 31, ao seu paso pola parroquia de Vilameá, no concello lugués de Guntín, tal e como informa o 112 Galicia.

Publicidade

Preme na imaxe para obter máis información do evento.

O aviso chegou ao 112 Galicia ás 16:20 horas a través do sistema eCall do propio coche accidentado. Os xestores da central puideron contactar coa condutora, quen confirmaba que estaba atrapada no interior do vehículo.

O accidente de hoxe en Guntín. Autor: GES de Friol-Palas.

Pouco despois, varias persoas que circulaban pola zona tamén chamaron ao número único de emerxencias para alertar do accidente e informaron de que o coche estaba envorcado.

Dende a sala de operacións do 112 Galicia activouse un dispositivo de intervención no que participaron Urxencias Sanitarias de Galicia-061, o GES de Friol-Palas, os Bombeiros de Chantada e axentes da Garda Civil de Tráfico.

Publicidade

Preme na imaxe se queres contactar connosco.

Os equipos de emerxencia tiveron que empregar material de excarceración para liberar á vítima, que foi evacuada nunha ambulancia en estado semiinconsciente.