Ulloa Viva recibe a unha delegación de Esquerda Unida para seguir recadando apoios contra Altri

Esta formación política amosou o seu compromiso de facer o posible para esixir responsabilidades por parte do goberno central así como de Europa

Ecos da Comarca/Palas de Rei

Lino Costas, Braulio Vilariño, Antonio Maillo, Zeltia Laya e Concha Casares o sábado na entrada na finca de Quintas.

A Plataforma Ulloa Viva mantivo este sábado unha reunión con Esquerda Unida para seguir recadando apoios na loita contra o proxecto da macrocelulosa de Altri-Greenalia en Palas de Rei. Neste encontro participaron: varios membros de Esquerda Unida, entre eles Antonio Maillo (coordinador federal), e integrantes de Ulloa Viva como Zeltia Laya (coordinadora do grupo de política da Plataforma), Concha Casares (Casa Alongos), Braulio Vilariño (Directiva Plataforma) e Chus Expósito (Milhulloa).

O encontro comezou nas instalacións desta última, onde explicou a afectación do seu proxecto con máis de 25 anos de historia. Expósito sinalou “que o seu proxecto se vería totalmente destruído” ao mesmo tempo Concha Casares apuntou a necesidade de que ao coñecer o proxecto “nos tivésemos que converter á forza en activistas mediambientais”.

Publicidade

Preme na imaxe para obter máis información do evento.

Durante a visita, a delegación de Esquerda Unida achegouse, acompañada polas integrantes de Ulloa Viva, á zona da Finca de Quintas onde Altri quere instalar a gran

fábrica de celulosa. A maiores, Zeltia Laya, voceira da Plataforma puxo en coñecemento da delegación de Esquerda Unida "os impactos que a macrocelulosa de Altri-Greenalia tería no corazón de Galicia, tanto a nivel socioeconómico, da biodiversidade, a auga, e a

contaminación, como sobre a saúde das persoas que viven na contorna polos efectos dos gases contaminantes, recoñecidos pola propia empresa". Explicándolles ao mesmo tempo todo o camiño de reivindicacións nas diferentes administracións que a Plataforma leva percorrido, anunciando tamén a intención de comezar o proceso administrativo e xudicial pertinente para parar a macrocelulosa.

Braulio Vilariño apuntou a importancia do impacto social acadado: manifestación en Palas de Rei de máis de 20.000 persoas, Arrodea a Xunta 30.000, Santiago de Compostela 100.000 e nesta última da Pobra do Caramiñal con 50.000, todo un éxito social que resposta de xeito moi claro ás declaracións feitas hai meses polo CEO de Altri, Soares Da Pina; que non se instalarían nun territorio onde non os quixeran.

Publicidade

Preme na imaxe se queres contactar connosco.

Para rematar, tanto Antonio Maíllo (coordinador federal de IU) como Lino Costas (Coordinador de EU) amosaron o seu compromiso de facer o posible para esixir responsabilidades por parte do goberno central así como de Europa na concesión de fondos para a instalación da proxectada macrocelulosa. Pola súa banda Maíllo ve un auténtico desproposito a súa instalación e pon como exemplo outros macroproxectos

que xa se conseguiron parar como o Almacén de Gas de Doñana.