Yolanda Díaz amosouse “radicalmente en contra” do proxecto e agradeceu á Plataforma a “defensa do territorio” nunha reunión mantida onte na Eira da Xoana de Ramil, Agolada
Laura Moure/Agolada/A Ulloa
A Plataforma Ulloa Viva mantivo onte pola tardeunha xuntanza coa vicepresidenta segunda do Goberno e ministra de Traballo, Yolanda Díaz, que se desprazou á Eira da Xoana (na parroquia de Ramil, Agolada) para coñecer de primeira man os informes dos membros da plataforma, técnicos e produtoras da zona arredor da problemática polo proxecto de Altri para instalar unha macrocelulosa en Palas de Rei.
Membros da plataforma, expertos en distintos eidos coma xeógrafos, médicos e biólogos e produtoras da zona explicaron a Yolanda Díaz os efectos que esta macrocelulosa tería sobre o territorio. Ao remate da xuntanza con membros de Ulloa Viva, Yolanda Díaz e Marta Gontá explicaron os acordos acadados. A vicepresidenta segunda do Goberno deixou claro o seu rexeitamento ao proxecto da macrocelulosa de Altri en Palas de Rei, e agradeceu a Ulloa Viva a súa “defensa do territorio”. Yolanda Díaz deu as grazas á plataforma “por defender a nosa contorna e un modelo produtivo sostible para Galicia”. A vicepresidenta segunda do Goberno deixou claro que está “radicalmente en contra deste proxecto”, que definiu coma “altamente contaminante, e que pon en risco a saúde pública da poboación e carece de valores democráticos primarios”
A voceira de Ulloa Viva, Marta Gontá, agradeceu a visita da vicepresidenta segunda do Goberno ao territorio e amosouse convencida de que “despois de escoitar o sentir dos veciños e veciñas, das produtoras afectadas e os informes dos técnicos, “teremos na
vicepresidenta do goberno unha garante dos nosos dereitos en Madrid”.
Gontá lembrou a loita que a Plataforma Ulloa Viva ten contra o proxecto da macrocelulosa,
e explicou que “queren instalarnos pola forza unha industria altamente contaminante que
emitirá 8.754 kg de gases contaminantes ao día por unha cheminea de 75 metros e verquerá, entre otras sustancias, 60 toneladas diarias de sulfatos ao río Ulla. Eso repercutirá na nosa saúde e no noso medioambiente de maneira irreversible, e por se iso
fora pouco, a fábrica de Altri competirá polos mesmos recursos que os nosos agricultores e gandeiros, e tirará por terra o Camiño de Santiago, todos eles sectores base do noso modelo socioeconómico. Vivimos cun modelo sustentable que redistribúe a riqueza, xenera
beneficios e calidade de vida”.
Lembrou a voceira da Plataforma que esta macrocelulosa pretende consumir tanta auga
coma toda a provincia de Lugo ao día (46 millóns de litros diarios) nun escenario de cambio climático “no que un proxecto coma este non debería nin ter chegado a tramitarse”, por iso en declaracións aos medios xunto coa ministra Yolanda Díaz, explicou que avalados por diferentes técnicos de distintas areas “queremos pedirlle a Díaz que coma vicepresidenta dun goberno progresista se comprometa con nós a parar este abuso sobre a poboación”.
Dixo Marta Gontá que “o pobo xa falou en máis dunha ocasión, o proxecto tivo máis de 23.000 alegacións en contra, máis de 20.000 persoas sairon ás rúas o pasado 26 de maio
en Palas de Rei a decir “Altri Non” e o 30 de xuño otras 30.000 persoas arrodeamos a Xunta de Galicia en Santiago para pedir a paralización desrta barbaridade”. Cos feitos na man, a voceira da Plataforma argumentou que “o corazón de Galicia, dende a Ulloa ata a Ría de Arousa ten claro que non quere esta macrocelulosa”, a pesares de que “os seus impulsores insisten en levar adiante un proxecto que non queremos nin necesitamos”.
Marta Gontá lembrou que “queren ademáis 250 millóns de euros de cartos públicos que ten que outorgarlles o Goberno do Estado, por iso confiamos en que o papel da vicepresidenta e a información que hoxe se leve de aquí de primeira man cos afectados,
sexa o punto e final a esta amenaza que o corazón de Galicia ten enriba”.
Outros membros de Ulloa Viva, coma Zeltia Laya e Adrián Gallero, aproveitaron o encontro
para transmitirlle á vicepresidenta do Goberno que “levamos meses pedindo reunións en
distintos ministerios sen resposta” e pediron a súa mediación para explicar os argumentos
da Plataforma en Ministerios coma Industria, Cultura, Sanidade ou o MITECO. Ademais
incidiron na incredulidade da Plataforma porque se estea a tramitar un proxecto “que incumpre directivas da UE” e lembraron que o goberno do Estado “ten o poder da aplicabilidade deses fondos que a empresa solicita, eses fondos non poden ser para unha
empresa cun proxecto que pretende deixar o territorio totalmente desolado”.
Auga e biodiversidade
Tamén tomaron a palabra na reunión biólogos, médicos e xeógrafos para explicarlle a Yolanda Díaz as implicacións do proxecto da macrocelulosa de Altri nestes eidos. Biólogos
alertaron sobre a Rede Natura e as especies ameazadas. Afirman que “a zona directamente afectada non está incluída na ZEC Serra do Careon” e critican o impacto “non recoñecidos pola empresa”, nas zonas limítrofes si incorporadas e noutras ZEC próximas (Sistema fluvial Ulla-Deza) afectadas polo verquiido (30 millóns de litros de auga diarios tratadas con químicos e a 27 graos).
Publicidade
En canto a especies ameazadas e catalogadas legalmente, explicaron á vicepresidenta
segunda as “graves afeccións que se derivarían” da implantación desta macroindustria, culpa tamén da “ausencia dos debidos Planos de Recuperación e Conservación, esixibles
na lexislación vixente”.
Polo que respecta ás afectacións na auga, expertos alertaron a Yolanda Díaz de que “o
estudo hidrolóxico realizado por Greenfiber é extremadamente simple e moi pouco rigoroso. Faise así para poder axustar os requirimentos de abastecemento da industria ao limiar de valores de calidade que pide a lei e acadar, finalmente, unha declaración de impacto ambiental favorable”. Segundo denunciaron, a empresa emprega datos de caudal mensuais ou anuais, “o que anula o comportamento diario do río, favorecendo que, por exemplo, os datos de dilución sexan favorables”.
Alertaron tamén de que “a duración do proxecto supera o período de concesión do encoro
de Portodemouros, o cal é esencial para o funcionamento da fábrica. Isto xera unha incerteza sen resposta clara, tanto desde o punto de vista ambiental como de seguridade”.
Ademáis os técnicos denuncian que “os valores calculados por Greenfiber non teñen en
conta as tendencias climáticas e hidrolóxicas das vindeiras décadas. Os datos oficiais
alertan dun importante descenso dos caudais en Galicia, concretamente na cunca do río
Ulla, xerando unha forte presión sobre o río. Cun descenso do caudal a situación aínda se
volve máis crítica e os valores estimados pola empresa nunca se cumprirían”.
Zona agrogandeira
Outra voceira da Plataforma, Isabelle Gómez, faloulle á vicepresidenta do Goberno da
preocupación do sector primario na zona afectada polo proxecto de Altri. “Este tecido
socioeconomico e empresarial desenvolvido en Galicia é o motor principal no corazón do
país, somos unha zona agrogandeira, coa riqueza da nosa biodiversidade e un importante
pulo agroecolóxico”. A ameaza dunha macrocelulosa en Palas de Rei ten un impacto
“terrible” neste sector. Isabelle Gómez, aproveitou para decirlle a Yolanda Díaz que é
preciso un pulo ao desenvolvemento da industria agroalimentaria na comarca e na
contorna, “hai que apoiar e desenvolver un sector que da valor engadido que queda no
territorio”.
A voceira da Plataforma incidiu en que “Galicia é rural, somos a despensa de parte do Estado”, e apostou por “promocionar e apoiar que esa despensa se poda desenvolver, teña un prezo xusto e o seu valor engadido quede no territorio”.
Comments