Silleda centra o orzamento de 2025 na mellora dos servizos públicos, o reequilibrio territorial e a estabilidade económica

O montante total supera os 8,3 millóns de euros e o documento será abordado o vindeiro luns en comisión informativa e someterase a debate en Pleno a vindeira semana

Ecos da Comarca/Silleda

O executivo local de Silleda levará a pleno a vindeira semana a aprobación inicial do orzamento municipal para o presente exercicio de 2025. O montante total das contas é de 8.637.933,85 euros, ca mellora da calidade dos servizos públicos, a xestión responsable e o reequilibrio territorial como liñas clave.

No tocante aos investimentos, o documento recolle actuacións clave para este ano como como a reforma da Praza da Igrexa de Silleda, para a preparación Integral da zona de xogos, na que se rebaixará o nivel do terreno para situar toda a plaza a mesma altura xerando zonas verdes e de arbolado, e instalando xogos infantis renovados. Esta actuación ten un importe de 192.090,43 euros.

O orzamento municipal inclúe tamén varias actuacións no rural. Así farase a reforma e acondicionamento do local social en Saídres, unha obra que permitirá a demolición total das antiguas escolas, unha estructura cuxo estado de conservación non ofrecía garantías de seguridade para as persoas usuarias dese espazo público, e que ten un valor de 78.471,56 euros.

No apartado de investimentos inclúese tamen a substitución da cuberta do consultorio médico da Bandeira, por un importe de 107.780,62 € cantidade necesaria para as obras completas, que se agarda reducir ca cofinanciación acordada ca Conselleria de Sanidade.

Inclúese tamén na partida a cofinanciación da nova Avenida do Parque, por importe de 149.424,60 no seu tramo entre a N5-5 e a Rúa santa Olaia, para así completar a subvención da Deputación a través do plan Extra do organismo provincial, que permitirá remodelar e humanizar este céntrico tramo. Asimesmo, tamén se dota ao orzamento con 118.201, 86 euros para as cofinanciacións de obras que o Concello terá que ir facendo ao longo do ano polas diferentes subvencións que están xa tramitadas.

Ademais destas obras, o Concello ten solicitado xa á Deputación de Pontevedra a través do plan Máis Provincia a reparación doutras infraestruturas locais en Breixa, Abades, Piñero, Lamela, Curro, Laro e Moalde. “Así mesmo, ao longo do ano iranse facendo outros investimentos e actuacións con recursos propios, como a extensión da rede de abastecemento municipal de augas ou outras obras de conservación e mantemento de viarios así como demandas veciñais”, engade a alcaldesa e responsable municipal de Facenda, Paula Fernández.

Publicidade

Preme na imaxe se queres contactar connosco.

Aumento en persoal polo SAF e a RPT

En capítulo de Persoal aumento un 44,96% respecto ao orzamento de 2022- último documento aprobado- , situándose en 3,6 millóns. Este aumento non responde a subas salarais senon a tres factores fundamentais: a municipalización do Servizo de Axuda no Fogar (SAF), que supón incorporar ao cadro de persoal a plantilla que ata agora dependía dunha empresa externa, cun custe aproximado de 800.000 euros anuais; a implantación da Relación de Postos de Traballo (RPT), aprobada a finais de 2022, que reorganiza e

profesionaliza a estrutura municipal e tamén a aplicación de trienios e previsións sociais derivadas da lexislación vixente.

Aínda así, dende o goberno local explícase que este aumento non supón un incremento real do gasto, xa que ao mesmo tempo se reducen os gastos correntes, ao non ter empresa contratada para o SAF, un gasto que se agora se integra no capítulo de persoal.

Aforro ca reducción de custes enerxéticos e reforzo de servizos

No que respecta aos gastos en servizos públicos, o capítulo 2 incorpora varias subas motivadas pola mellora e reforzo de contratos clave, necesarios para garantir unha atención axeitada tanto nos cascos urbanos como nas parroquias. Así, no orzamento figura o contrato do alumeado público (220.000 euros), que non existía en 2022, e a recollida de lixo, que medra en 90.000 euros, debido á incorporación da nova fracción FORSU (50.000 euros) e á achega derivada do convenio coa Deputación, de control de vertidos de orgánico.

Tamén cómpre sinalar o aumento da partida destinada ao tratamento de residuos sólidos urbanos (RSU), que acada os 266.000 euros, un 36 % máis ca en anos anteriores. Este incremento débese ás subas aplicadas por Sogama e á decisión da Xunta de Galicia de retirar as bonificacións ambientais, penalizando a concellos como Silleda que destacan pola súa alta taxa de reciclaxe e boas prácticas ambientais.

Tamén o servizo de xardinería se incrementa en 100.000 euros, co fin de asumir as melloras introducidas no novo contrato social de catro anos que está en tramitación, e que inclúe subas salariais, novas zonas verdes urbanas e máis frecuencias de mantemento. O contrato, cun custo base de 53.615 €, precisa agora dunha dotación total de 106.000 € para cumprir con todos os obxectivos.

Na mesma liña tamén aumenta a dotación para os traballos de desbroce (50.000 euros máis) co obxectivo de garantir un traballo de reforzo no verán integral a través de empresas externas en camiños e espazos públicos nas parroquias, reforzando así a atención ao rural, cos medios propios durante todo o ano.

En contraposición, o Concello logra reducir nun 32 % os custos en enerxía eléctrica, grazas á contratación a través da Central de Compras da FEMP, o que supón un aforro de 44.000 euros anuais para as arcas municipais.

Capítulo de Ingresos

En canto ao capítulo de ingresos, Fernández Pena advirte que o goberno volve a aplicar a filosofía da prudencia e o rigor económico, en base a liquidacións anteriores, “cun enfoque de previsión prudente e realista nos ingresos”. Para a confección do orzamento de ingresos empregouse unha metodoloxía rigorosa de previsión, coa finalidade de que as cifras sexan o máis realistas posible e evitar desfases ou correccións no futuro. “Tratamos de buscar e garantir unhas contas saneadas, sen desviacións, consolidando a boa saúde financeira do Concello e mantendo o equilibrio orzamentario acadado nos últimos anos​”, engade a rexedora.

Os ingresos correntes, cos que o Concello financia os servizos día a día, manteñen un incremento sostido en 2025, consolidando a tendencia positiva dos últimos anos. Nesta anualidade non se prevén subas significativas nas taxas máis alá das actualizacións regulamentarias. En conxunto, os capítulos 1, 2 e 3 (impostos e taxas) achegarán unha cantidade similar ou algo superior á do exercicio previo, reforzada por unha mellora na efectividade recadatoria.

No tocante ás transferencias (capítulo 4) destacan as achegas do Estado, a través da Participación nos Tributos do Estado (PIE) e doutras transferencias, que medran respecto de anualidades anteriores. En 2025 o Concello conta cunha maior participación nos fondos estatais, logo de que nos últimos anos o Goberno central incrementase as entregas a conta aos concellos. De feito, a liquidación do exercicio 2022 supuxo para Silleda un ingreso extraordinario de case 400.000 euros adicionais por parte do Estado (respecto da previsión inicial dese ano)​, o que corrixiu á alza os recursos dispoñibles.

As transferencias da Xunta de Galicia manteñense conxeladas a pesar das serias dificultades as que someten aos concellos galegos ao obrigar ás entidades locais a financiar o 50% do SAF.

As achegas da Deputación de Pontevedra permiten, un ano máis, poder realizar investimentos a través do plan Máis provincia co que se farán a maioría dos investimentos incluídos no orzamento.

En conxunto, as transferencias correntes achegarán máis de 3,5 millóns de euros en 2025, reforzando a solvencia do Concello. “En resumo, os ingresos correntes para 2025 medran de forma prudente pero sostida, garantindo a cobertura dos gastos habituais”, remarca Paula Fernández.

Aprobación inicial a vindeira semana

Logo da súa presentación á Mesa de Persoal en días pasado, o vindeiro luns día 7 celebrarase a comisión informativa previa ao pleno extraordinario na que se realizará a aprobación inicial do documento. Na mesma sesión tamén se presentará a proposta de actualización da taxa por recollida e tratamento de lixo, a partir de 2026.