Silleda acollerá o 17 de maio unha nova edición de Xonga, a Festa da Cultura Tradicional Galega

 Este ano, coincidindo co Día das Letras Galegas, renderá unha homenaxe especial ás cantareiras

Laura Moure/Silleda

Silleda prepárase para acoller unha nova edición de Xonga, o festival que celebra a nosa música, baile e cultura tradicional nunha xornada onde as protagonistas son as asociacións que participan e amosan o seu labor en cada edición. Este ano, coincidindo co Día das Letras Galegas, Xonga renderá unha homenaxe especial ás cantareiras (cun énfase especial ao concello), sumándose á posta en valor da nosa tradición oral e musical. A cita será o 17 de maio no parque das Pedrosas (en Silleda) nunha edición onde a natureza será tamén protagonista e que promete ser un encontro cheo de enerxía, cultura e identidade galega.

A Asociación Xirandola e o Concello de Silleda coorganizan esta edición especial, na que se convidará a todas as agrupacións do municipio de Silleda. Un evento para todos.

Desde as 13:00 horas, XONGA abrirá co xa tradicional vermú de benvida, un espazo distendido onde os asistentes poderán compartir conversas, anécdotas e calor humano... A continuación, haberá un xantar popular con churrasco, viño, refrescos, postre e café, converténdose nunha excelente oportunidade para compartir mesa e fortalecer vínculos entre as diferentes asociacións culturais, músicos e amantes da nosa tradición. Os detalles sobre a reserva do xantar serán anunciados nos próximos días.

Pero Xonga non é só un xantar... é unha xuntanza. Desde as 16:00 horas, a festa continuará cunha tarde chea de voz (onde as cantareiras de toda a comunidade nos farán vivir unha experiencia única), música e baile. "Todos os asistentes están convidados a participar activamente, traendo os seus instrumentos e as súoas voces... Pero o máis importante son as ganas de pasalo ben, polo que se non sabes tocar, bailar... ¡Tamén Xonga é para ti!", sinalan dende a organización. "Ademais, para os máis pequenos (e non tan pequenos), haberá xogos tradicionais e actividades culturais que recuperarán a esencia das festas populares de antano".

As cantareiras, protagonistas desta edición

Este ano, Xonga quere destacar o papel fundamental das cantareiras, uníndose ao conxunto de actividades que se farán dende o Concello de Silleda, aquelas mulleres que, ao longo das xeracións, preservaron o noso patrimonio oral e musical. Desde o Concello de Silleda, farase un chamamento especial a todas as asociacións para que as cantareiras se sumen a este evento. Non importa a idade nin a experiencia: Xonga é o espazo perfecto para que a diversidade e riqueza do noso canto tradicional brille con forza.

Publicidade

Preme na imaxe se queres contactar connosco.

Dende o Concello de Silleda estase a pechar a programación cultural de maio, con especial atención á tradición oral e as cantareiras, na que Xonga será unha das actividades centrais no propio Día das Letras.

Un festival de todos e para todos

XONGA naceu co obxectivo de unir a todas as asociacións culturais da comarca de Deza e Galiza nunha xornada de intercambio e posta en valor do noso legado. Co paso do tempo, consolidouse como un espazo de referencia para a cultura tradicional galega, grazas á implicación de colectivos, músicos e amantes da nosa identidade. "E nesta edición, volvemos demostrar que Xonga é de todos e para todos. Non perdas esta oportunidade de formar parte dunha celebración única! Marca no calendario o 17 de maio e vén gozar con nós de Xonga 2025. A cultura galega fainos fortes cando a compartimos".