Primeiro aniversario das protestas dos carteiros de Lalín que aseguran seguir na mesma situación

"Atopámonos nas mesmas circunstancias de precariedade que un ano atrás e as catro prazas vacantes seguen sen cobertura ", sinalan os traballadores

Laura Moure/Lalín

Onte, día 29 de xaneiro, os empregados da Unidade de Reparto de Correos de Lalín celebraron un ano desde o inicio das súas mobilizacións. Porén, máis alá do conmemorativo da data, nada teñen que celebrar, "pois atópanse nas mesmas circunstancias de precariedade que un ano atrás" e que os impulsaron a denunciar publicamente a súa situación laboral. Un ano despois, as catro prazas vacantes, sinalan, seguen sen cobertura e a correspondente carga de traballo segue a recaer no conxunto dos membros do cadro de persoal.

Transcorreu un ano no que se convocaron concentracións todos os meses: diante da Unidade de Reparto, diante da Oficina de atención ao público, diante do Concello de Lalín, diante da dirección de zona en Santiago de Compostela, diante da dirección provincial en Pontevedra e con ocasión de moitas feiras dos días 3 e do 18 á entrada da mesma. Incluso se fixo unha protesta cos coches particulares dos carteiros a modo de caravana que percorreu os cascos urbanos de Lalín, Dozón, Rodeiro e Agolada, pois polos catro concellos se desenvolve o labor diario dos carteiros e carteiras da Unidade de Reparto de Lalín.

Publicidade    

Preme na imaxe se queres contactar connosco.

"En todo momento intentouse establecer un diálogo coa empresa para tratar de poñer fin á situación de precariedade vivida, mais o que se comprobou unha e outra vez foi o desinterese da empresa polo benestar dos seus traballadores e até o momento non se ofreceu ningunha solución ao conflito. Ao contrario, pois Correos mantén a intención de extinguir definitivamente as catro vacantes, o que suporía a cronificación da precariedade actual. Como xa se denunciou en comunicados anteriores, continúan as repercusións no benestar físico e psicolóxico dos traballadores. Neste último ano sucedéronse as baixas causadas por prolongados estados de estrés e ansiedade xunto con varios accidentes laborais, dos cales o máis grave ocorreu hai apenas unhas semanas e saldouse cunha persoa ferida e unha furgoneta de reparto sinistrada".

A todo iso hai que engadir tamén "o descontento do persoal pola inactividade administrativa de Correos no relativo ás conciliacións e pola falta de transparencia na contratación de persoal eventual". Así mesmo, os carteiros manifestan a súa preocupación pola negociación dun novo convenio colectivo que prevé un empeoramento nas condicións de traballo e non contempla a corrección das eivas que contén o actual.

De igual xeito, a outra cara da moeda son os beneficiarios do servizo postal público, é dicir, todos os cidadáns e cidadás dos concellos de Lalín, Dozón, Agolada e Rodeiro, que sofren de primeira man a precariedade dos carteiros, cuxa sobrecarga de traballo lles impide cumprir coa lexislación postal vixente, que contempla o reparto diario de correspondencia en todo o territorio. Á vista de todas estas circunstancias, con nada que celebrar e moito que reivindicar, os carteiros volveron concentrarse onte. Desta vez no cruce da Fonte dos Cabalos, onde levaron unha tarta para simbolizar o paso do tempo á vez que a súa unidade fronte á precarización.