Nicolás González Casares reincide nos riscos que representa Altri para o ecosistema mariño galego

Alertou de novo no Parlamento Europeo "das ameazas concretas que afronta Galicia co proxecto de macrocelulosa que a empresa Altri pretende implantar en Palas de Rei"

Ecos da Comarca/Xeral

O eurodeputado lalinense Nicolás González Casares fixo un chamamento este mércores no Parlamento Europeo para construír un Pacto Europeo dos Océanos que conte coa xente do mar. González Casares arrancou a súa intervención cuns versos do poeta Manuel Antonio: “Fomos ficando sós / o mar, o barco e máis nós”, para destacar a profunda vinculación que ten Galicia co mar e reclamou coidar desa relación, tanto a nivel galego como europeo, no plan que se está a traballar.

Casares con Mónica Cea, da Plataforma Ulloa Viva, en meses pasados.

“Se queremos un pacto digno dese nome, o primeiro pacto debe ser coa xente do mar, que gañan e xogan as súas vidas nel”, defendeu. Neste sentido, reivindicou o papel exemplar da pesca e acuicultura galegas, “as máis sostibles do mundo”, e insistiu en que calquera nova normativa debe garantir a compatibilidade coas actividades mariñeiras tradicionais e respectar os usos persistentes.

Casares tamén aproveitou o debate para alertar sobre as ameazas concretas que afronta Galicia, referíndose ao proxecto de macrocelulosa que a empresa Altri pretende implantar en Palas de Rei. González Casares advertiu que “debemos protexer os nosos mares, especialmente augas arriba, de actividades que poden ser insostibles, como as que pretende facer o goberno da miña rexión”. Unha preocupación que xa leva tempo amosando o PSdeG respecto á falta de garantías ambientais, sociais e económicas deste proxecto.

Publicidade

Preme na imaxe se queres contactar connosco.

“Si ao Pacto Europeo dos Océanos, desde a base e cos profesionais no centro”, concluíu o eurodeputado. A proposta da Comisión Europea busca poñer fin á fragmentación das políticas mariñas e consolidar un modelo de economía azul sostible e respectuosa cos ecosistemas. O pacto, que será presentado oficialmente este verán, ten como obxectivo protexer a biodiversidade, garantir a sostibilidade das actividades mariñas e reforzar a resiliencia das comunidades costeiras.