Luis López remarca en Rodeiro, o compromiso da Deputación coa mellora dos servizos no Concello

Laura Moure/Rodeiro

O presidente da Deputación de Pontevedra, Luis López, afirma que se “Pontevedra é a provincia do deporte” é, en boa parte, pola aposta estratexia que o goberno provincial está levando a cabo en concellos de todo o territorio para modernizar as instalacións municipais a través de plans específicos e pioneiros como o segundo Plan Extraordinario de Infraestruturas Deportivas. É o caso de Rodeiro, que a través das dúas edicións deste programa provincial recibiu un total de 121.000 euros da Deputación para ampliar e mellorar as pistas de pádel municipais. Nunha visita este martes a este recinto deportivo acompañado polo alcalde, Jose Luis Camiñas; e o tenente de alcalde Alberte Lamazares, e outros concelleiros, o presidente Luis López defendeu o compromiso do goberno provincial coa descentralización non só no ámbito administrativo ou cultural, tamén no deportivo, dotando a concellos como o de Rodeiro de instalacións de calidade e de alta demanda para que os veciños poidan facer deporte sen desprazarse a outros concellos.

A colaboración entre a Deputación e o Concello de Rodeiro permitirá a execución dunç proxecto consistente na construción dunha nova pista de pádel e dunha cuberta para o recinto. A través da primeira edición do PEID, a Deputación concedeu ao Concello unha subvención de 31.700 euros para a construción da superficie para unha segunda cancha aprobada xa mediante resolución presidencial. Na segunda entrega, que se aprobará o vindeiro luns en Xunta de Goberno, a contía subiu ata os 89.200 € que servirán para a construción dunha cuberta para as dúas pistas e o peche perimetral da segunda. Un proxecto que demostra a vontade de cooperación da Deputación co goberno local, que destina os recursos das dúas edicións deste plan á mellora destas instalacións municipais. “Estas pistas de pádel municipais de Rodeiro están hoxe máis preto de ser unha realidade”, sinalou López.

Publicidade

Preme na imaxe para obter máis información do evento.

O Plan Extraordinario de Infraestruturas Deportivas da Deputación repartiu na súa primeira edición un total de 4 millóns de euros entre os 59 concellos de menos de 50.000 habitantes da provincia. Nesta segunda entrega duplica o seu orzamento ata os 8 millóns de euros. Trátase dun plan que está a ter unha excelente acollida entre os concellos e que, despois dunha primeira entrega exitosa, este ano incorporou novidades como o incremento da dotación mínima que reciben os concellos, que pasa dos 25.000 euros do ano anterior, aos 75.000 euros actuais. Unha mellora que beneficia sobre todo a concellos pequenos como Rodeiro.

Publicidade

Preme na imaxe se queres contactar connosco.

A visita deste martes do presidente Luis López ao seu concello de orixe non é a primeira. En novembro do ano 2023 asinou co alcalde un convenio para a humanización da Rúa B e no pasado inverno mantivo encontros co sector gandeiro, que recibe tamén o apoio provincial. Tampouco é este proxecto de colaboración o único que ten en marcha o organismo provincial este ano en Rodeiro. A través dos distintos plans de Cooperación que ten en marcha o goberno provincial está prevista unha achega de 1,23 millóns de euros. A través do plan +Provincia, correspóndelle ao Concello de Rodeiro un total de 639.660 euros; do segundo PEID, 89.223€; e do Plan Extra, 500.000 euros.