Esta semana levarase a cabo unha campaña de vixilancia e control de transporte escolar

A subdelegada do goberno, María Rivas, destacou que o transporte escolar é o primeiro colectivo de seguridade vial con cero falecidos en sinistros de tráfico desde 2012

Laura Moure/Xeral

A subdelegada do goberno na Coruña, informou que ao longo desta semana, as Agrupacións de Tráfico da Garda Civil levarán a cabo servizos de control e vixilancia do tráfico, con especial atención á campaña sobre transporte escolar. A campaña de control e vixilancia sobre o transporte escolar inscríbese na relevancia do transporte de viaxeiros, máis transcendente aínda, se cabe, do réxime de transporte de viaxeiros vinculado ao ámbito escolar, que segundo os datos do INE no ano 2022 deu servizo a máis de 200.000 escolares.

María Rivas, indicou que durante a campaña, intensificaranse os labores de inspección dos vehículos destinados ao transporte escolar, comprobando a documentación relativa ás autorizacións necesarias para a prestación do servizo, así como do propio vehículo en relación ás súas condicións técnicas e elementos de seguridade. Tamén se prestará especial atención ao condutor profesional, a súa habilitación e permiso de condución, así como os seus tempos de condución e descanso.

Publicidade

Preme na imaxe para obter máis información!

Co ánimo de intensificar os resultados da campaña e estender as intervencións ás vías urbanas de circulación, a subdelegada do Goberno na Coruña indicou que se convidarán aos concellos para sumarse á mesma, establecendo medidas de control e vixilancia sobre o transporte escolar durante esas datas.

María Rivas lembrou que na campaña de transporte escolar realizada do 22 ao 26 de maio do ano pasado na provincia da Coruña, a Garda Civil controlou un total de 192 vehículos e recompilaron 162 denuncias, das 293 que se formularon. Entre outros, os motivos das denuncias estiveron relacionados con permisos e papeis necesarios para a prestación do servizo, como pode ser a autorización especial de transporte escolar, con 64 denuncias; o seguro de responsabilidade ilimitada, con 51, e o sinal de transporte escolar, que recompilou 10.

Publicidade

Preme na imaxe para obter máis información.

A subdelegada fixo fincapé en que o transporte escolar é o primeiro colectivo de seguridade viaria que alcanza a obxectivo “visión cero” con cero falecidos en sinistros de tráfico desde 2012, e é un dos medios máis seguros para o colectivo de usuarios das vías de cero a quince anos, tal e como se recolle no estudo publicado pola Fundación Liña Directa titulado Transporte escolar: viaxan seguros os nosos fillos?. O estudo sinala que a maioría dos sinistros do transporte escolar con vítimas concéntrase nas vías interurbanas, sendo as distraccións as infraccións sancionadas máis frecuentes, seguidas da desatención á prioridade doutros vehículos, a velocidade inadecuada e non respectar a distancia de seguridade.

Así mesmo, identifica que Galicia, Andalucía e Comunidade Valenciana son as comunidades autónomas con máis accidentes de transporte escolar. O caso galego é especialmente rechamante, xa que só supón o 5% dos accidentes xerais, pero o 21% dos de transporte escolar. A Guía da Dirección Xeral de Tráfico Ao cole sempre seguros sinala que o 90% dos sinistros de tráfico con nenos que se producen en relación co transporte escolar ao colexio teñen lugar no momento de subir ou baixar do vehículo, ou xusto nos instantes inmediatos e, en moitos casos, trátase de atropelos causados por unha distracción.

Publicidade

Preme na imaxe se quere contactar connosco.

Menciona tamén que unha gran parte deses sinistros con lesións graves están relacionados coa ausencia do uso adecuado dos cintos de seguridade. Por todo iso, establece unha serie de recomendacións aos proxenitores, como non pararse nunca detrás do autobús dado que non nos ven, esperar un sinal do condutor e cruzar sempre polo menos tres metros por diante, ir sentado e co cinto posto, non correr nin ao chegar nin ao saír, mirar aos dous lados antes de cruzar e facelo sempre en zona de semáforos ou pasos para peóns, camiñar polo interior da beirarrúa, lonxe do bordo, non cruzar as rúas ou prazas en diagonal ou facendo zig-zag, ter coidado cos coches que entran e saen dos garaxes, ir pola esquerda na estrada, e de noite, levar pezas reflectoras.