Dúas persoas feridas en Melide tras precipitarse o coche no que viaxaban por un desnivel

Ecos da Comarca/Melide

Dúas persoas que viaxaban nun turismo resultaron feridas ao precipitarse por un desnivel despois de saírse da vía cando circulaban pola AC-840, á altura do punto quilométrico 48, en Melide.

Ás 12:00 horas, un particular chamou ao 112 Galicia para informar dun accidente cun turismo na estrada que une Melide e Boimorto. Segundo o relato do alertador, o vehículo caeu por un terraplén e chocou contra uns arbustos. Debido á posición na que se atopaba o coche, os seus ocupantes poderían experimentar dificultades para abandonalo polos seus propios medios, tal e como informa o 112 Galicia.

Decontado, dende o 112 Galicia informouse da situación aos servizos sanitarios, aos Bombeiros de Arzúa, aos axentes da Garda Civil de Tráfico e da Policía Local, ben como aos efectivos de Protección Civil de Melide.

Preme na imaxe se quere contactar connosco.

Unha vez no lugar, os equipos de intervención informaron ao 112 que non foi necesario empregar o material de excarceración. Aínda así, tiveron que forzar unha das portas do vehículo para facilitar o acceso aos feridos.