Continúa a programación cultural de Arzúa este venres con María da Pontragha en Lema

Laura Moure/Arzúa

O Departamento de Cultura do Concello de Arzúa botou a andar o pasado venres unha nova edición da programación Primavera de cultura que se estenderá ata finais de maio con propostas para todos os públicos centradas especialmente no fomento da lectura e das Letras Galegas.

Unha das sesións anteriores do programa "As parroquias contan"

Despois da exitosa presentación do libro A capital do mundo do coñecido escritor Xavier Alcalá, a programación continúa este venres, 28 de marzo, cunha nova entrega do programa As parroquias contan que chegará ao local social de Lema cunha sesión para todos os públicos a cargo de María da Pontragha e unha posterior chocolatada popular para todas as persoas asistentes. A actividade comezará ás 20:30 horas e a entrada será libre e de balde.

A programación seguirá en abril con actos centrados en fomentar a lectura comezando pola conmemoración do Día do Libro Infantil e Xuvenil que contará o venres 4 con obradoiros nos centros educativos de infantil e primaria e cunha sesión de contacontos titulada O fantástico carro dos sonos a cargo de Juste Kamishibai na biblioteca municipal ás 18:00 horas.

O sábado 12 Bruno Lernout presentará os seus libros Vivir y aprender e Rectificar es de sabios nun acto que terá lugar na Capela da Madanela a mediodía. O autor aproveitará para abrir unha mostra de fotografía que se poderá visitar nas semanas seguintes.

O Día do Libro, que se celebrará o mércores 23 de abril, o Departamento de Cultura promoverá de novo a campaña Arzúa conta coa entrega dun agasallo con cada préstamo na biblioteca municipal ou con cada merca dun libro nas librarías locais.

Publicidade

Preme na imaxe se queres contactar connosco.

Para rematar o mes de abril, o venres 25 levarase a cabo unha sesión de cine clásico despois do éxito que tivo a realizada no pasado mes de xaneiro. Nesta ocasión proxectarase o filme Desayuno con diamantes na Casa de Correos ás 20:30 horas. Para participar será necesario anotarse previamente a partir do día 22 de abril.

A programación Primavera de cultura terá continuidade no mes de maio con varios eventos centrados especialmente na conmemoración do Día das Letras Galegas. O concelleiro de cultura, José Luís García, destaca ter artellado unha programación “para fomentar a lectura e o coñecemento das nosas Letras cun amplo abano de posibilidades para todos os públicos”.