BNG, AxA e PSOE aproban unha moción en rexeitamento ao novo proxecto de reapertura da explotación mineira de cobre de Cobre San Rafael, S.L.
Ecos da Comarca/Arzúa
O Concello de Arzúa avanzou este mércores na mellora das súas infraestruturas coa aprobación do complemento ao Plan de Obras e Servizos (POS+) 2025. Con este novo importe, a suma total destinada a investimentos municipais a través deste mecanismo de financiamento da Deputación supera o millón de euros, converténdose na maior partida de financiamento recibida ata a data a través deste programa.
O alcalde, Xoán Xesús Carril, destacou a importancia desta achega, sinalando que "supón un avance fundamental para garantir servizos de calidade e mellorar a seguridade viaria, especialmente no rural". Ademais, engadiu que "este investimento permitirá executar obras esenciais para a veciñanza, asegurando accesos mellores e un saneamento máis eficiente".
Proxectos previstos dentro do POS+ 2025
A inversión inclúe actuacións que suman un total de 355.673,30€, destinadas á mellora da calidade de vida da veciñanza de Arzúa, con especial atención ao rural. Entre os proxectos destacan:
Acondicionamento do Camiño a Cortobe (Burres), Capela do Viso e de Filgueira a Vilasuso
Mellora do Camiño de Doroña-Castañeda e da Castañeda a N 547
Saneamento no Camiño da Empegada.
Mellora da seguridade viaria na Rúa Rego da Raña.
Ampliación do saneamento en Castañeda.
Outros acordos plenarios
A aprobación deste POS+ foi só unha das numerosas cuestións abordadas no plenario, entre as que tamén se incluíu a petición dunha subvención nominativa á Deputación da Coruña para financiar a 50ª edición da Festa do Queixo. O obxectivo é manter ou aumentar o financiamento logrado na 49ª edición, que por primeira vez alcanzou os 120.000 euros, fortalecendo así a viabilidade do proxecto e favorecendo a implicación doutras institucións.
Publicidade
Tamén contou co mesmo consenso a aprobación da proposta de ditame para a declaración de especial interese ou utilidade municipal das obras de ampliación da explotación de gando vacún de leite a nome de Blanco Fraga, S.C. Todos os grupos da corporación coincidiron en que é necesario favorecer o crecemento e a inversión empresarial na zona para impulsar a creación de emprego e fomentar o asentamento de poboación no concello.
A mina de Cobre San Rafael
Menos consenso acadaron outras cuestións debatidas no pleno, como a aprobación da moción presentada conxuntamente polo grupo de goberno (BNG, AxA e PSOE) en rexeitamento ao novo proxecto de reapertura da explotación mineira de cobre de Cobre San Rafael, S.L. nos concellos de Touro e O Pino. "Xa que diversos estudos sinalan que o proxecto poñería en risco as explotacións gandeiras da comarca, o medioambiente e a saúde da veciñanza, nomeadamente a da veciñanza da parroquia de Dombodán, debido á proximidade da zona onde se instalaría esta industria. Neste caso, a moción saíu adiante en segunda votación, grazas ao voto de calidade do alcalde". O rexeitamento á mina foi aprobado cos votos a favor do BNG, AxA e PSOE, mentres que o PP votou en contra da prohibición do proxecto.
Do mesmo xeito, o pleno aprobou a moción presentada polo grupo municipal do BNG a prol da lingua galega, relativa á situación do idioma propio da Galiza e á adopción de medidas para a súa normalización. Tamén foi aprobada en segunda votación, co voto favorable do BNG, AxA e PSOE, e os votos en contra do PP, saíndo adiante grazas ao voto de calidade do alcalde.
Mobilidade no Concello
A última moción en ser debatida foi a presentada polo grupo municipal do PP, relativa á mobilidade nos municipios galegos. O informe instaba ao Goberno de España a garantir a mobilidade das localidades afectadas pola nova proposta do mapa de concesións estatais en liñas de autobús, que suporía a eliminación de paradas e afectaría a 22 concellos da Galiza. A moción saíu adiante cos votos favorables do PP e do BNG, a abstención de AxA e o voto en contra do PSOE.
Compromiso coa transparencia
A sesión plenaria foi aberta a toda a veciñanza e puido ser seguida en directo a través da radio municipal pública Radio Arzúa, así como a través da web e redes sociais do ente radiofónico. Ademais, está dispoñible na páxina de Facebook de Radio Arzúa, onde se pode acceder a unha información máis detallada sobre os debates e decisións tomadas no pleno.
Comments