Arzúa acollerá o IV Ciclo do Programa Universitario de Maiores da USC

As primeiras sesións celebraranse os días 14 e 15 de abril e é necesario inscribirse

Laura Moure/Arzúa

O Concello de Arzúa colabora coa Universidade de Santiago de Compostela (USC) na realización do IV Ciclo do Programa Universitario de Maiores, que comeza este mes de abril baixo o título "Camiños de Coñecemento e Experiencia". O obxectivo deste proxecto da USC é democratizar o acceso á formación universitaria para persoas maiores de 50 anos, achegando coñecemento especializado e fomentando a participación activa na vida cultural e social.

As primeiras sesións celebraranse os días 14 e 15 de abril na Aula Cemit (Rúa Lugo, 45), co obradoiro sobre "Especies arbóreas da contorna", impartido pola colaboradora Blanca Fraga Cimadevila, que achegará á veciñanza coñecementos sobre a biodiversidade local. A programación continuará coas sesións sobre "Alfabetización Audiovisual e Expresión Fílmica" os días 28 e 29 de abril, dirixidas polo profesor Álvaro Dosil Rosende, quen abordará as claves da linguaxe audiovisual e cinematográfica; e coas sesións de "Historia da fotografía: unha viaxe desde a cámara escura ata a era dixital", os días 2 e 5 de maio, dirixidas pola investigadora Katia Cino Rouco, especializada no estudo histórico e pedagóxico da fotografía.

Publicidade

Preme na imaxe para obter máis información do evento.

A inscrición é gratuíta e pode realizarse no Concello de Arzúa, a través do correo electrónico miguel.vallo@concellodearzua.com ou chamando ao teléfono 981 500 000.

Publicidade

Preme na imaxe se queres contactar connosco.

"Desde o Concello queremos animar á veciñanza maior de 50 anos a participar nesta iniciativa que promove o enriquecemento persoal, social e cultural", destacou Xoán Xesús Carril, alcalde de Arzúa. Máis información estará dispoñible nas redes sociais do Concello, onde se publicarán periodicamente os detalles das distintas actividades.