As actuacións enmárcanse no Plan de Nova Arquitectura Pedagóxica, que centra o 40% do seu orzamento en intervencións para a mellora da eficiencia enerxética
Laura Moure/Deza
O conselleiro de Cultura, Educación, FP e Universidades, Román Rodríguez, anunciou este mércores que a Xunta de Galicia destina este ano 2022 máis de 6 millóns de euros a unha quincena de obras en centros educativos da comarca de Deza-Tabeirós. Fíxoo no marco dunha visita aos traballos que a Xunta de Galicia acaba de acometer para mellorar a carpintería exterior e parte das luminarias do colexio CEIP Cabada Vázquez da Estrada.
Durante a visita ao centro, o responsable autonómico de Educación salientou que o obxectivo destas intervencións é continuar “a renovación dos edificios do sistema educativo galego ao abeiro do Plan de Nova Arquitectura Pedagóxica para seguir adaptándoos ás necesidades do século XXI”.
![](https://static.wixstatic.com/media/11062b_2aa4052c0b8744a3a5a178822c21d85c~mv2.jpg/v1/fill/w_980,h_700,al_c,q_85,usm_0.66_1.00_0.01,enc_auto/11062b_2aa4052c0b8744a3a5a178822c21d85c~mv2.jpg)
Neste senso, Román Rodríguez explicou que unha das prioridades do plan é mellorar a eficiencia enerxética dos colexios e institutos. “De feito, do total de 191 M€ deste plan, o 40% está destinado a actuacións de sustentabilidade e eficiencia enerxética”, afirmou antes de precisar que se trata dunha achega de 77,5 M€. Así mesmo, lembrou que a Xunta leva investidos máis de 112M€ desde 2017 en obras de eficiencia enerxética nos centros educativos, o que supón un aforro enerxético medio do 45%, tanto en kwh/m2 como en emisións de CO2.
No caso da comarca de Deza estase actuando no IES Ramón María Aller de Lalín e IES Plurilingüe Pintor Colmeiro de Silleda e nos colexios CEIP Xesús Golmar e CEIP Xoaquín Loriga de Lalín. Ademais, está previsto licitar novas intervencións nos vindeiros meses no colexio de Dozón e no colexio CEIP Ramón de Valenzuela de Silleda.
Comments