A Xunta adxudica axudas a 78 escolas de música, entre elas de Silleda, Cruces, Agolada, Lalín e Santiso

Benefícianse desta liña, dotada con 265.000€, centros que dependen tanto de administracións municipais como de entidades sen ánimo de lucro

Laura Moure/Xeral

A Xunta vén de publicar no Diario Oficial de Galicia do día 7 de xaneiro a resolución pola que se conceden as axudas dirixidas a escolas de música públicas e privadas dependentes de concellos e de institucións sen ánimo de lucro. En total a Consellería de Educación, Ciencia, Universidades e FP destina 265.000 euros a estas subvencións, das que este ano se benefician 78 escolas de 67 concellos de toda a xeografía galega, nas que estudan case 12.200 alumnos. Entre elas figuran varias das comarcas.

A convocatoria establece dúas categorías, unha para escolas de música públicas dependentes dos concellos e outra para as que dependan de institucións sen ánimo de lucro. En ambos os casos, os centros debían estar incluídos no Rexistro de Escolas de Música e Danza da Comunidade Autónoma de Galicia.

O obxectivo desta convocatoria é potenciar o funcionamento dos centros que imparten ensinanzas de música non regradas, dirixidas ao público en xeral, e prestarlles apoio ás iniciativas para o fomento, difusión e extensión destas ensinanzas por parte, tanto dos concellos como das entidades sen ánimo de lucro que teñen entre os seus fins a formación musical.

Non en balde, este tipo de escolas funcionan como canteira para a formación de afeccionados e nas súas instalacións prepárase ao alumnado para as probas de acceso aos estudos conducentes á titulacións oficiais de Música.

Na primeira categoría concédense axudas por un importe total de 100.000 euros a 42 escolas. Das comarcas figuran nesta categoría a Escola de Música Municipal de Silleda (Con 227 alumnos recibe 3.727,42 €) e a Escola de Música Municipal de Vila de Cruces (Artística de Merza) (con 88 alumnos recibe 1.444,99 €).

Cabe mencionar que a Escola de Música Municipal de Arzúa quedou excluída por falta de achega de certa documentación.

Publicidade    

Preme na imaxe se queres contactar connosco.

Na segunda categoría outórganse axudas por importe de 165.000 euros a 36 escolas e das comarcas serán beneficiarias a EMUSPR de Agolada (con 98 alumnos recibe 2.757,65 €), EMUSPR Banda de Lalín (con 102 alumnos recibe 2.870,21 €), EMUSPR Escola de Música de Vilatuxe (Lalín) (con 143 alumnos recibe 4.023,92 €) e a EMUSPR de Visantoña (Santiso) (con 75 alumnos recibe 2.110,45 €).

Os interesados poden consultar todas as beneficiarias no seguinte enlace: https://www.xunta.gal/notas-de-prensa/-/nova/008747/xunta-adxudica-axudas-78-escolas-musica-67-concellos-nas-que-estudan-12-200-alumnos