A Deputación e a Xunta recoñecen o traballo de Protección Civil nas xornadas provinciais en Palas

Ecos da Comarca/Palas de Rei

A Deputada de Réxime Interior, Promoción do Territorio e Turismo, Pilar García Porto, participou este sábado na inauguración das VIII Xornadas provinciais de Protección Civil que se celebran en Palas de Rei. Na cita, que tivo lugar á entrada da Casa da Cultura deste concello, García Porto destacou que a Deputación de Lugo brinda a través do Plan Deputación axudas importantes para a actividade das agrupacións dos concellos.

“Unhas xornadas que son á vez un recoñecemento do traballo das Asociacións de Voluntarios de Protección Civil da nosa provincia, e un exemplo da aposta continuada pola preparación e a formación para dar resposta ás demandas da sociedade”, valorou a Deputada. “A presencia das cores de Protección Civil é unha garantía de tranquilidade e seguridade para todos os veciños e veciñas. Son un referente, un punto de información, de axuda e de organización”, continuou.

Xunto a García Porto, participaron o Presidente da Federación Lucense de Agrupación de Voluntarios de Protección Civil (AVPC), José Franco Criado, e o Alcalde do municipio, Pablo Taboada, entre outras autoridades.

Pola súa banda, o director xeral de Emerxencias e Interior, Santiago Villanueva, participou xunto co delegado territorial da Xunta en Lugo, Javier Arias, na VIII Xornadas provinciais de Protección Civil, onde destacou a xenerosidade do voluntariado destas agrupacións pola súa dedicación altruísta para garantir a seguridade cidadá.

Publicidade

Preme na imaxe para obter máis información.

Na súa intervención, Santiago Villanueva referiuse a estes colectivos como piares fundamentais na prevención de riscos e na atención ás emerxencias. Nesta liña, incidiu no agradecemento ao esforzo e ao compromiso das persoas que forman parte destas agrupacións e que comparten o obxectivo de velar pola seguridade e o benestar da cidadanía. Así, lembrou que en 2023 estes colectivos realizaron máis de 50.000 operativos en toda Galicia, boa parte deles en fins de semana ou datas sinaladas, demostrando a súa dedicación cando máis se precisa e xerando tranquilidade na poboación.

O director xeral reafirmou o apoio da Xunta ás Agrupacións de Voluntarios de Protección Civil (AVPC) para facilitarlles o desenvolvemento do seu traballo coa máxima eficacia e seguridade. Así, contan con diferentes liñas de axuda que supuxeron un investimento superior aos 24 millóns de euros nos últimos anos.

Publicidade

Preme na imaxe se queres contactar connosco.

Este financiamento permitiulles reforzar o seu equipamento coa adquisición de novos vehículos, equipos de protección individual e ferramentas tecnolóxicas avanzadas a prol da capacidade operativa e a seguridade do persoal voluntario. A isto súmase unha liña anual de axudas destinada ao mantemento da súa actividade, que ascende a 340.000 euros e que só este ano beneficiou preto de 200 colectivos.

A formación é outro dos piares do apoio do Goberno galego ás AVPC, con cursos específicos impartidos a través da Academia Galega de Seguridade Pública (Agasp). Ao longo do último ano houbo case un cento de accións formativas nas que participaron 2.000 persoas.