A Deputación de Pontevedra organiza tres novos obradoiros da Rede SmartPeme+

Son gratuítos, pero é necesario inscribirse previamente

Ecos da Comarca/Deza

A Deputación de Pontevedra organiza esta semana tres novos obradoiros de capacitación tecnolóxica ao abeiro da Rede SmartPeme+. As accións, todas elas en formato telemático e con inscrición previa e afondarán en cuestións de interese para o tecido empresarial da provincia como son o posicionamento en buscadores, contido estratéxico para Instagram e o márketing de contidos.

Hoxe, luns, tivo lugar pola mañá o obradoiro telemático “SEO para e-commerce. Posiciona a túa tenda en liña en Google”. A acción, coordinada polo punto SmartPeme+ do Porriño, afonda nas técnicas de posicionamento en buscadores que axudan a mostrarse ao público obxectivo do comercio, coa finalidade de poder satisfacer as necesidades ou desexos cos produtos ofrecidos. Foi impartido por Esther Garcinuño, Diplomada en Ciencias Empresariais, coa especialidade de márketing e dirección comercial, e Enxeñeira Técnica en Informática de Xestión, con preto dunha década de experiencia en deseño, desenvolvemento e dirección de proxectos web.

O martes 15 ás 12:00 horas celebrarase tamén en formato telemático o obradoiro “Crea contido estratéxico para o teu Instagram”, coordinado pola oficina de Lalín. Os participantes aprenderán a crear contido visual atractivo para Instagram utilizando imaxes e deseños de impacto. Na acción explorarán que é o contido estático e como aproveitalo dentro da plataforma, aprenderán a empregar ferramentas como Snapseed e Canva para edición e deseño e a publicar estratexicamente para mellorar a presenza da súa marca. As inscricións para esta acción, impartida por Lara Taboada, Titulada Superior en Ensinos Artísticos de Deseño Gráfico, con experiencia en fotografía de produto e composición fotográfica creativa, poden realizarse neste formulario.

Publicidade

Preme na imaxe para obter máis información do evento.

Por último, o mércores 16 a partir das 11:00 horas a oficina de Ponteareas coordina o obradoiro telemático “Márketing de contidos: como xerar unha estratexia efectiva”. Este curso permitirá que as empresas cheguen á súa audiencia potencial dun xeito intelixente e emotivo para diferenciarse do resto ofrecendo contido interesante e valioso co que se sinta identificada e xerando empatía. As inscricións poden realizarse neste formulario e será impartido por Laura Carrera, graduada en Publicidade e Relacións Públicas e posgraduada en Dirección de Comunicación Corporativa.

Publicidade

Preme na imaxe se queres contactar connosco.

A Deputación destina este ano 1,45 millóns de euros á Rede SmartPeme+ e Acelera Pyme Rural para asesorar persoas emprendedoras desde as oficinas de Barro, Cambados, Lalín, Ponteareas, Pontevedra, O Porriño e Vigo. Desde esta rede lévanse a cabo actividades formativas relacionadas co crecemento empresarial e a transformación dixital, asesorando a ata 2500 emprendedores, autónomos e pemes ao ano e impartindo arredor de 200 talleres formativos e actividades complementarias.