O alcalde reclama máis medios para loitar contra eles e sobre todo fóra da campaña de alto risco de incendios
Ecos da Comarca/Agolada
Lamentablemente nesta semana o municipio de Agolada rexistrou tres incendios forestais que suman unhas 47 hectáreas calcinadas. O Concello de Agolada lamenta esta situación que produce graves danos ambientais e mostra a súa total repulsa contra este atentado.
O primeiro deles orixinouse este martes pola noite na parroquia de Ventosa que tamén acabou afectando a Ferreiroa. Segundo os datos proporcionados pola Consellería de Medio Rural arderon 14 hectáreas. Iniciouse ás 21:09 horas e quedou extinguido ás 3:40 horas. Afectou a 14 hectáreas: oito arboradas e seis de monte raso. Nas tarefas de extinción participaron catro axentes, seis brigadas, cinco motobombas e unha pa.
Mentres este xoves rexistráronse outros dous lumes. Un deles de novo na parroquia
de Ventosa e outro na de Vilariño. No caso de Vilariño, que tamén afectou a terreos de
Esperante, comezou segundo Medio Rural, ás 1:29 horas, quedou controlado ás 6:13
horas e extinguido ás 13:16 horas. Afectou a 22,6 hectáreas, das cales 20,6 foron
arboradas e dúas rasas. Na súa extinción participaron dous axentes, seis brigadas, dúas
motobombas e unha pa.
![](https://static.wixstatic.com/media/0216be_ccb810aacc2340589fbcc1d72df0f41c~mv2.jpg/v1/fill/w_812,h_613,al_c,q_85,enc_auto/0216be_ccb810aacc2340589fbcc1d72df0f41c~mv2.jpg)
En canto ao lume de Ventosa este, tal e como informa a Consellería, iniciouse ás 8:04 horas e deuse por extinguido ás 13:57 horas. A superficie afectada foi de 10,2 hectáreas de monte arborado. No seu control estiveron traballando un axente, tres brigadas e unha motobomba.
“Temos que concienciarnos que os lumes forestais teñen un impacto devastador e ademais, van en contra de todo traballo e esforzo dos veciños de Agolada”, lamenta o alcalde do municipio, Luis Calvo, quen bota en falta máis medios contra incendios e máis fóra da campaña de alto risco de incendios. “Agolada, pola súa situación xeográfica debería ter unha dotación de efectivos permanente e é algo que dende o Concello imos trasladarlle á Xunta”, indica o mandatario. Así mesmo, Calvo recalca que “imos estar moi vixiantes para que isto non volva ocorrer. Dende logo, que non se pode permitir”.
Reunión cos axentes
Axentes da Garda Civil e da Policía Autonómica reuníronse esta mañá co rexedor agoladés e xa están traballando na investigación.
A Consellería de Medio Rural lembra que está a disposición da cidadanía o número de teléfono gratuíto 085, ao que deben chamar en caso de detectar algún lume forestal. Ademais existe un teléfono anónimo e gratuíto para denunciar calquera actividade delituosa incendiaria da que se teña sospeita ou coñecemento. Este é o 900 815 085. Así mesmo toda a información actualizada sobre os incendios forestais poderá ser consultada na conta aberta de twitter@incendios085.
Comments